玩跪地求婚？ 蔡思貝同余德丞影「全家幅」
撰文：東方新地｜圖片：新傳媒圖片、Instagram
蔡思貝 同余德丞襯「情侶裝」
余德丞8月8日晚與朋友在西營盤中山紀念公園球場踢波，其間疑身體感不適到場外長椅休息，未幾突然暈倒，其後由救護車送往瑪麗醫院搶救，情況一度非常危殆。之後Dickson住院近一個月，終獲醫生批准出院，昨日 (23日) 更首次公開現身，孖住蔡思貝一齊出席活動，兩人喺活動上同樣著上黃黑色打扮，似足情侶裝！
喺台上兩人更「打情駡俏」，Dickson笑言：「我一醒番你就短髮，差啲唔認得你！」之後Dickson更單膝跪地，向蔡思貝送上一紮以蔬菜紮成嘅「花束」，場面好似求婚一樣。
問蔡思貝呢日佢哋係咪以情侶檔身份出騷？佢話：「係好朋友身份！」更感情表示：：「佢暈咗時我好震驚，即刻趕去醫院，我發現自己好珍惜呢個朋友，可以話友情升溫！」Dickson聞言即向思貝講「對唔住」。
余德丞：醫生話我係心律不正
Dickson就親自憶述昏迷當日嘅情況：「當時踢踢吓波有啲眼瞓，咪出咗場邊休息，跟住就瞓着咗⋯⋯之後醒番，其他嘢完全冇印象，係聽媽咪講我瞓咗兩、三日，醒番就認得屋企人，雖然唔係落到床咁誇張，但真係奇迹嚟！醫生話我心臟亂跳，即係心律不正。」
講到外表瘦咗唔少，Dickson直言：「其實體重差唔多，醫生叫我呢兩個月唔可以做劇烈運動，淨係可以踩吓室內單車，我咪睇吓波先，踢波就出年先再踢。」講到大病過後嘅得著，佢就話：「個人慢活啲、珍惜生命同朋友，以往一句『祝你身體健康』好似冇乜嘢，但經歷過先知一切唔係必然！」
台下有唔少fans到場為Dickson打氣，Dickson藉機感謝喺佢患病期間幫助過佢嘅家人、朋友同fans：「好多謝我媽咪同埋啲親戚，因為我喺醫院嘅時候一日三餐都照顧得我好好，喺昏迷期，都有好多人嚟探我，我好多謝佢哋，就算無嚟醫院嘅我都多謝你哋啲訊息，仲有啲粉絲DIY卡、拍嘅片，同埋全香港嘅市民又為我集氣令到我醒返！」
第一次見家長
呢日蔡思貝父母都有到場參觀活動，見到Dickson向蔡思貝「求婚」嘅場面，蔡媽媽即場拍晒手掌，原來Dickson第一次見蔡思貝父母，呢對緋聞情侶更唔介意同蔡父蔡母一齊合照影「全家幅」。
蔡思貝笑言：「我十個有九個朋友都見過我爹哋媽咪，我爹哋媽咪好開通，好鍾意同我啲朋友打成一片！」Dickson即刻話：「係咩？咁我都過去同佢哋打成一片先！」
講開又講，剪咗個「男仔頭」嘅蔡思貝，真係比「木村女」木村光希更加似木村拓哉喎！
同場加映：余德丞出院後首現身獲店員於單據留言送祝福！
余德丞自出院後，一直少有公開露面，但日前下晝，本刊記者就影到余德丞與男性朋友揸車去到筲箕灣東大街嘅安利食嘢！見佢着住黑tee同短褲，戴住cap帽，驟眼望落整體精神都叫幾好，不過身形就明顯比之前消瘦！
余德丞親身接受記者訪問
余德丞見到記者依然笑容滿面，出停車場後更邊行邊接受訪問，相當友善！當問及其身體情況時，Dickson指自己身體狀況唔錯，而且指自己體重同出事前差唔多。
至於工作方面，Dickson直言若有拍攝嘅工作就應該唔會停，但始終都需要交由公司再安排，並強調會以休息為先。
Dickson食完嘢之後再次接受本刊記者訪問，當問到需唔需要喺飲食上戒口，佢就話西醫並冇特別講話要。
之前有指原本有兩套劇集嘅角色意屬余德丞，但因佢出事入院，令劇集需另外換演員頂替，對於係咪錯失拍劇機會，Dickson則表示：「冇特別問到。」
由於Dickson出事入院後曾有圈中好友到醫院探訪，當被問及有冇相約其他好友相見，佢就指：「自己暫時唔係見咗好多朋友。」另外，問Dickson需要休息幾耐，佢就話：「要再聽吓醫生點講。」同時，佢亦表示自己仍需要去醫院覆診，但就冇透露係睇邊科嘅醫生。
獲店員於單據留言送祝福
其後，Dickson亦有於個人社交網上載美食，同大家分享牛腩撈粗同油菜。
除此以外，佢仲上載張單據，見到店員寫上「Getwell soon」祝福Dickson，堅係好有愛呀！
余德丞出院 短期內不可做運動
計番佢差唔多住院一個月，余德丞話發咗長文多謝醫護人員、家人、朋友、所有關心佢嘅人，仲話：「生命無take 2 ，今次咁好彩有多一次機會，我一定會好好珍惜。」
在 Instagram 查看這則貼文
我出院啦🎉🎉🎉感謝瑪麗醫院既醫生同護士們，見住你地早更完又夜更，又一大早巡房，又每日24小時留意住我既病情，真係辛苦你地！ 感謝我既屋企人，每日擔心我病情既變化，又驚我唔知有咩需要，仲要每日頻頻撲撲幫我準備三餐。 感謝我公司，我經理人同一班好同事，成日擔心我會鑽牛角尖亂咁唸，一得閒就開解我。 感謝我既朋友，知我一個人悶，一有空檔就嚟陪我傾計，仲要買埋生果糖水俾我食。 感謝每一位關心我既你地同支持我既 fans，係唔同既社交平台都見到有好多問候我既訊息。雖然我未能夠一一回覆，不過我絕對感受到你地既心意。 不過坦白講，原來連續咁多日面對住一樣既三面牆，加埋打唔開既窗，感覺真係好難受！所以我都希望今次之後，我既身體會生生性性，爭一口氣，唔好再令大家擔心。 醫生話短期之內唔可以做運動住，相信都會係我最唔習慣既。生命無 take 2 ，今次咁好彩有多一次機會，我一定會好好珍惜。俾啲時間，等我休養多一陣，好快我就會重新出發💪🏼#我只想身體健康 #回家最好不過 #第二生命#comebackstronger #happybirthdaytome #hk #hkig #instadaily #yuts
Dickson Yu 余德丞（@yuduck）分享的貼文 於張貼
9月2日生日嘅余德丞，仲同自己講生日快樂，咦！唔知呢個生日蛋糕係邊個送畀佢呢？
余德丞仲晒出患病期間，朋友送畀佢嘅簽名卡，仲有出事前拍緊劇集《鐵探》嘅一班同事嘅簽名！
最想飲珍珠奶茶
之前余德丞一醒番，除咗多謝各位嘅集氣同祝福，仲話過出院想飲珍珠奶茶，唔知依家飲咗未呢？
在 Instagram 查看這則貼文
係呢段日子，好多謝全香港，你地每一位，既關心問候祝福同支持🙏🏼希望可以快啲出院食餐好同飲珍珠奶茶😋#抬頭吧黑暗過會是晨曦 #集氣成功 #多謝大家 #hk #hkig #instadaily #yuts
Dickson Yu 余德丞（@yuduck）分享的貼文 於張貼
