老竇做教育局高官 何浩文 屈住荃灣工廈
何浩文 捱足七年終上位
08年男子跳唱組合Bro 5出身、出過半裸寫真、假假地8年前仲做過無綫偶像劇《南華夢飛翔》男主角，28歲的 何浩文 捱足七年，直到15年全裸上陣演出《鴨王》先終於有個人代表作。14年簽埋晶哥做親生仔，食住《鴨王》個勢，高峰期一個月接超過廿場內地夜場騷搵人仔，年初又同友人合資開手握飯團店做老闆，總算風生水起！
延伸閱讀：
將赴日拍AV 麥紫莉：唔怕搵唔到男朋友
2017港姐12強一覽
何浩文 憑「瀟灑哥」成功入屋
雖然《賭城群英會》口碑好壞參半，不過 何浩文 飾演「瀟灑哥」表現不俗，叫做成功入屋，近日頻頻在無綫節目出鏡，
因為「瀟灑哥」帶挈成功入屋，何浩文日前在九龍城一間茶室內同吳幸美、麥美恩齊齊為無綫新節目錄影。
何浩文 父親做教育局高官
在公，何浩文聽話聽教又賣口乖，識得叫老闆王晶做「爸爸」，其實在私一樣有個猛料老竇，其親生爸爸何振業係教育局課程發展處總課程發展主任，母親是中學教師，佢本人中學畢業後曾赴英國留學，家境相當不俗，不過仍願意入行捱騾仔！
拍劇時傳出和父母同是教育界的「十優港姐」麥明詩傳緋聞，原來唔係高攀，都算門當戶對！
家境不俗一樣慳家
做鴨王做到入血、看似花弗的 何浩文 ，估唔到工作以外都係工作。日前佢被本刊發現錄完節目後，先去天后操三粒鐘gym，之後再過荃灣練四粒鐘桌球，為慳個錢，全程巴士、港鐡駁腳，更疑似平租工廈單位當居所獨居。
有自家工作室
之後 何浩文 在電話中親自解畫，話荃灣工廈其實係自家工作室，佢對本刊記者話：「我父母住荃灣、自己喺荃灣都有個竇自己住，不過一返到屋企就會有惰性，所以係特登逼自己喺studio過夜，寫吓劇本、剪吓片、練吓歌可以做多啲嘢！」成了佢第二個家。
近日何浩文剛剛完成另一部晶哥網劇從內地回港，回港後真正體驗電視劇入屋威力，去到邊都有街坊要求合照，佢話：「以前識我嘅觀眾局限於16至30歲，套劇出街後，真係多咗其他年齡層識我。收入同工作係多咗，不過我係工作狂又唔鍾意瞓覺，一日流流長起碼食五、六餐，所以慳得就慳，留番啲錢食飯同儲嚟買樓好過！」
