吳家樂在劇中飾演城寨武林高手馮春美，人如其名係個娘娘腔，畫晒眼線又搽唇膏。雖然造型被指抄襲香港作家余兒小說《九龍城寨》中、其中一個叫「龍捲風」的角色，但都無阻觀眾對佢的喜愛！

家樂仔將呢個角色演得入木三分，眼神笑容都勁奸，舉手投足亦做到角色女性化一面！雖然係娘娘腔，不過佢每次出場都霸氣十足，嗰種笑裏藏刀的神情睇到觀眾不寒而慄，一句講晒：好戲！

接下來劇情將會講到花曼終於露出真面目，為報殺父之仇而跟春美決一死戰！預告片中見到花曼着住套類似貓女郎的黑衣，而春美就鬧咗佢一句「反骨女」，之後兩人隨即展開激戰！

雖然春美的擒拿手功夫了得，又配合劇毒鐵爪，不過在花曼的八極拳前卻被比下去！佢連中花曼幾記重擊，節節敗退。如果想睇花曼點樣殺死殺父仇人，就要繼續留意《城寨英雄》啦！

家樂仔在TVB多年，其實甚少在劇集中佔戲咁重，對上一齣《愛‧回家》做郭少芸男友「涼粉」，觀眾已經算比較有印象。不過今次春美呢個角色咁突出，難怪網民都留言激讚！

除了讚家樂仔，亦有網民留言讚王君馨，大家都不約而同話佢又索又好打！

全文完