林子善 明年大婚 預告星級兄弟團
廣告
今年娛樂圈喜事多籮籮，由韓國雙宋到香港郭富城、陳柏宇、王君馨等人結婚，日前又有藝人宣布喜訊，就係 林子善 啦！正拍攝《果欄中的江湖大嫂》的子善同圈外女友Kary拍拖多年，恩愛非常，經常喺IG放閃晒恩愛，二人結婚相信大家不感意外。自《怒火街頭》彈起之後，子善劇接劇，收入急升，近年更升呢為茶餐廳老闆，依家準備做人夫，可以話係事業愛情兩得意！
林子善 宣布結婚
林子善 今年忙裏偷閒，終於搵到時間註冊結婚，但其實呢段愛情並唔係風平浪靜，去年兩人因家人催婚，子善壓力大到一度分手逃避，當時佢以為跟女友分開可以冷靜一下，但兩人一齊經歷咁多風風雨雨，突然分開發覺自己冇咗對方唔得，所以子善下定決心向女友開出結婚承諾。佢表示婚禮已經搞左一半，酒席、場地亦搞得七七八八，到二月份就全力搞婚事，結完婚就開工或者陪太太去旅行。
延伸閱讀：
環遊世界 蜜月造人 黃翠如 蕭正楠8月結婚
蕭正楠黃翠如結婚 曹永廉自爆做伴郎
星級兄弟團
林子善圈中人緣好好，佢日前自爆兄弟團人選，可謂粒粒皆星！有鄭嘉穎﹑馬國明﹑黃嘉樂﹑唐詩詠，仲有黃長興同袁偉豪，就牌面睇已經係《萬千星輝賀台慶》！
婚禮請埋星爺
另外星爺周星馳可算係子善的啟蒙老師，那些年只有16歲的子善參加電影《喜劇之王》試鏡，有幸被星爺睇中，扮演黑社會角色「洪爺」出位，成功喺觀眾心中留下印象。子善揚言婚禮一定會請埋星爺，不過都明白對方貴人事忙，未必會到。
