《深宮計》收買人命 監製錫晒周秀娜劉心悠
廣告
無綫50周年重頭劇《宮心計2 深宮計 》，除了胡定欣、馬國明及馬浚偉做鐵膽，久違的羅霖、張慧儀及張文慈亦有份拍，更有重金禮聘周秀娜與劉心悠兩大外援。不過有傳為了遷就娜姐同心悠檔期，無綫親生仔女就要經常捱通宵拍攝！繼早前馬明自爆曾經連踩27.5小時後，羅霖亦哭訴拍通頂捱到殘，冇得見仔！
合拍劇 製作嚴謹
《深宮計》係和內地騰訊的企鵝影業合作，投入的資金多了，所以拍攝非常嚴謹，在服飾造型上亦更有要求，花在試造型與換妝的時間亦比較長。而為了畫面更加精美，又採用單機拍攝，演員每說兩句對白就要換機位，本來全劇拍攝周期預計長達半年，但以現時進度，到八月都未必能煞科。
馬明地獄式連踩27·5小時
早前馬國明就自爆曾連踩27·5小時，由中午12點直踩到翌日的下午3點半，破晒TVB最長工時紀錄！平時慣晒通頂開工的馬明都大叫頂唔順。難怪心穎BB早前接受訪問都大呻同馬明見面時間少啦！
娜姐心悠獲厚待
《深宮計》卡士強勁，當中最矚目非首次參與無綫劇的周秀娜與劉心悠莫屬。兩人以外援身份入劇組，待遇當然寧舍不同！據知娜姐同心悠雖然唔係主角，但戲份都唔少，但開拍前佢哋已經同監製講明要遷就外面的工作，同埋唔會捱通頂。所以好多時劇組要朝早拍咗佢哋嘅戲先，即係話凡係同佢哋有對手戲嘅演員，都經常由日頭拍到夜晚，甚至通宵！
羅霖狂呻
外援獲厚待，不過就辛苦其他人捱更抵夜啦。其中已經廿年冇拍劇的羅霖人前人後狂呻辛苦，日前佢一臉疲態表示試過連續三晚通頂，又或者五日每天只睡一、兩小時。捱夜都其次，最慘係連寶貝仔都冇得見！難怪佢話以後唔再拍古裝！
